Tamara Álvarez e Javier Gómez, dous veciños da localidade asturiana veciña dos Oscos, decidiron apostar pola tradición e mudarse a vivir á Fonsagrada xunto coa súa filla Iria collendo o relevo dunha panadería local; así foi como en xullo do 2015 botou a andar O Pan de Iria chegando a ser hoxe en día unha panadería de referencia en toda a zona.

Gardando a tradición deste oficio e empregando os catro ingredientes principais para elaborar masa de pan, como son: masa nai, unha coidada selección de fariñas de trigo e centeo, auga e sal, conseguen un produto saboroso e de calidade recoñecida polos usuarios que trae un recordo ó pan da casa ou pan do país como se lle chama nesta zona de A Fonsagrada.

Este pan tradicional galego caracterízase por presentar unha codia fina e crocante, textura firme e miga esponxosa que garda o seu sabor e frescura durante un par de días.

Pero, non só do pan vive O Pan de Iria, senón que elaboran no seu obradoiro empanadas de diferentes tipos: atún, liscos, tenreira... dispoñibles os xoves e con entrega garantida os venres antes das 13.30 horas nos seus fogares, preservando todas as súas cualidades.

Tamén son especialistas en tartas, pasteis e galletas que venden na súa panadería e cafetería, polo que para probalo nada mellor que achegarse á Fonsagrada e degustalo.