Tempo de grella, tempo de churrasco

É unha verdade universalmente recoñecida que as estacións, en Galicia, son dúas: de Samaín a Beltane, a do cocido, e de Beltane a Samaín, a do churrasco. Benvido todo o mundo á estación do churrasco.

Empecemos polo principio. Antes da romanización de Galicia, os poboadores dos territorios da Europa Atlántica desenvolveran unhas formas de medir o tempo cronolóxico a partir da observación dos astros e dos ciclos que se repiten na natureza. Considérase que, coa música, a literatura oral e as pinturas rupestres, a observación do paso do tempo foi unha das primeiras actividades intelectuais da humanidade.

Estes pobos atlánticos, que se deron en situar dentro dunha cultura céltica, dividían o ano en dúas estacións. Unha estación das tebras, que comezaba cos festexos de Samaín (arredor do 1 de novembro, o punto intermedio entre o equinoccio de outono e o solsticio de inverno), que celebraban o fin das colleitas e as preparacións para resgardarse dos rigores invernais, e unha estación da luz, que daba inicio en Beltane (polo 1 de maio, xusto a medio camiño entre o equinoccio de primavera e o solsticio de verán), unha chamada á fertilidade da terra, os cultivos e os gandos.

Recoñecemos as antigas tradicións de Samaín e Beltane nas celebracións de Defuntos e os Maios que aínda perviven en Galicia. Desde hai uns anos, esa comunidade crecente que é o Galituíter (as persoas que chían e rechouchían en galego en Twitter) estableceu que a estación das luces é tamén a estación das churrascadas. Carne de tenreira e porco á grella. Uns chourizos frescos. Longas sobremesas á sombra nestes días con atardeceres tardíos e ganas de reencontrarnos coa familia e as amizades.

A cesta de churrasco de Son de Lugo ofrece falda de tenreira galega suprema de A Carqueixa, costillar de porco de Embutidos de Suarna e chourizos frescos de porco celta de Céltico. Poderá recibilo no seu domicilio en formatos de 2,5, 5 e 10 quilos, porque en Son de Lugo procuramos adaptarnos a familias e grupos de amigos de distintas dimensións. Cada un dos produtos da cesta de churrasco de Son de Lugo chegará á súa casa envasado ao baleiro individualmente e debidamente refrixerado. 

O churrasco é tan, tan galego que nos chegou desde a emigración a América, como tantas das nosas mellores tradicións. Contan os cronistas que a primeira  churrasquería de Galicia empezou a servir carnes á brasa na Pobra do Brollón, na Ribeira Sacra, nos anos setenta do século pasado. Tal foi o éxito desta forma de preparar a excelencia das nosas carnes de tenreira e de porco que se instalou nos nosos corazóns e nos nosos costumes. Quen se atrevería a negar que as churrascadas son hoxe un dos nosos sinais de identidade?